السلام عليكم ورحمة الله وبركاته
الفترة اللي فاتت من ساعة رمضان كنا بنعمل انشطة بسيطة واغلبها قراءة كتب وقصص نظرا لضيق الوقت بس الحقيقة حتى لو اليوم عدى من غير منعمل اي حاجة غير قصص ولعب حر انا ببقى مبسوطة وببقى حاسة انها فعلا اتعلمت حاجات كتير مش شرط حاجات اكاديمية وانشطة محددة، خلال الفترة اللي فاتت ابتدينا نركز اكتر على الحروف والقراءة بالفتحة انا عارفة انا اعتبر متأخرة جدًا في تعليم الحروف لبنتي لأنها قربت على 5 سنوات ولسه بتتعلم الحروف بس الحقيقة حاسة انها حاليا مستوعبة كويس واسرع ومش هفضل الوم نفسي اني اتأخرت معاها في الحروف، الحقيقة من ساعة مبطلت اجلد نفسي وانا حقيقي ابتديت انجز الحمدلله رب العالمين طبعا اللي قادر يبدأ بدري شوية حسب شغف طفله ويبقى براحته كل اسبوع حرف بانشطة والعاب كتير يبقى افضل طبعا بس انا بنقلكم تجربتي مش اكتر وعموما في والدورف بيشجعوا جدا تأجيل التعليم الاكاديمي في السنين الاولى
في والدورف مفيش حاجة مجردة لازم الطفل يتعلم الحاجة وسط قصة وخيال ورسمة طبعا اني اطبق ده في تعليم الحروف العربية كان صعب لأن مفيش مناهج جاهزة مركزة على اللغة العربية بالطريقة دي اوي بس حاولت اجمع من هنا ومن هنا الحمدلله قدرنا نظبطها إلى حد ما
الكتاب ده جزاهم الله خيرا اللي دلوني عليه
في والدورف الحرف بيبقى جاي جوة رسمة عشان تخيل الطفل وكمان نحكي قصة عن الصورة دي ونرسم الرسمة بالوان شمع او مياه وممكن كمان نمثلها سواء بنفسنا او بمجسمات بسيطة جدا من حاجات طبيعية وممكن ندخل بقى اي انشطة عايزينها ع الحروف، انا كنت بجيب الرسمة من الكتاب وادور على اي قصة ع النت ع الصورة او حتى ادخل صورتين زي ديك وذئب وفي حرف "د و ذ" وادور على قصة فيها الديك والذئب ونحكيها من غير صور ولا حاجة عشان خيال الطفل وبعدين نرسم الرسمة وجواها الحرف زي كده
حرف ال"ض"
حرف ال"ب"
حرف ال"أ"
حرف ال"ت"
في افكار وانشطة كتير بقى ممكن نعملها بالحروف زي الصلصال والعجين والطين ويفضل كمان نعمل الحروف بحركة في الهوا بالايد كاننا بنكتب الحرف في الهوا وبالجسم كمان
وبخصوص الرسم ممكن الام والطفل او المعلم يعني والطفل يعدوا يرسموا سوا والطفل يشوفنا واحنا بنرسم وبنحاول نرسم بطريقة بسيطة وبهدوء وبدقة حتى لو مبنعرفش نرسم، كانوا في منهج اوك ميدو بيقولوا ان الفكرة اللي عندنا اننا مبنعرفش نرسم دي بتبقى بسبب انظمتنا التعليمية اللي بتحددنا في قوالب معينة وبنصدق اننا معندناش قدرات فنية وان محدش بيرشدنا للأنشطة الفنية واحنا صغيرين بس لو وقفنا الافكار دي عن نفسنا وابتدينا نمارس انشطة فنية هنكتشف اننا نقدر نتعلم الرسم والانشطة الفنية واننا لما نساعد ولادنا على الرسم والتلوين والنحت والتشكيل بنفتحلهم عالم من الفرص الإبداعية، الموضوع ببساطة ان الرسمة بتاعة الحرف بتبقى قدامنا فاحنا بنحاول نقلدها بشكل بسيط مش لازم تبقى متقنة وطبعا الافضل ان الصفحة تبقى كلها الوان بعد الرسمة الاصلية نشجع الطفل انه يلون باقي الصفحة كلها (احنا لسه موصلناش اوي للمرحلة دي)
في كتب كمان تبع نفس المؤلفة امل فرح اسمه "ابتشو" بيعلم الاطفال صوت الحروف للاسف مش لاقياه دلوقتي عشان اصورلكوا شكله انا جبتهم عموما من مكتبة ديوان
الكتاب اللي جاي ده كمان ساعدنا على نطق الحروف بالفتحة واننا نتعلم بداية القراءة بالفتحة كلمة من 3 حروف الحقيقة بنتي حضرت دورة أبجد مع معلمة صديقة وهي ماشاء الله اولا عرفت تحببهم جدا في اللغة العربية وماشاء الله وفرت عليا وقت وجهد كتير وخلت الولاد يبتدوا يقرأوا وبرضه دلتنا على اسطوانة نور البيان كويسة جدا حتى لو ربع ساعة في اليوم مش اكتر نزلوها من ع النت
دي بقى ليستة بمصادر او مناهج اللغة العربية في حاجات انا جربتها وفي حاجات الحقيقة اشترتها ولسه مفتحتهاش وفي حاجات عجبتني حد قاللي عليها او شوفتها ع النت وبرضه مجربتهاش بس هجمعلكوا كله خصوصا اللي لسه بيبدأوا من الاول ان شاء الله يارب تكون مفيدة ليهم
بس اهم حاجة محدش يعمل تشتيت لنفسه اختاروا منهج او طريقة معينة وهاتوا كتبها واشتغلوا بيها مش لازم تجيبوا كل ده طبعا وانا رأيي نبتدي بوالدورف وفكرة الرسمة والقصة كبداية لتعليم الحروف ونعمل انشطة على الحروف وبعدها ننتقل بقى للكتب التانية
1- رحلة مع قلم رصاص وميدو في عالم الحروف (دار الكلمة) حلوين اوي بس لسه مشتغلتش بيهم وفي كذا مستوى
http://www.darelkalema.com/ar/19-educational-programs?id_category=19&n=72
دي صفحتهم عليها كل منتجاتهم
2- دي كتب من مكتبة البلسم لسه مشوفتهمش ع الحقيقة بس عجبوني جدا في اصدقاء قالولي عليهم بس لسه مروحتش
دي صفحتهم
https://www.facebook.com/AlBalsamBookstore/?fref=ts
3- منهج أغاريد الطفولة
ودي صفحتهم
https://www.facebook.com/Makkasoft-Company-191865910824218/
4- دي سلسلة اسمها "سلسلة القصص المنهجية" كل قصة على حرف جبتهم من معرض الكتاب بس مكنوش كلهم، اظن بيتباعوا في مكان اسمه Fusion في اكتوبر معنديش معلومات اكتر ممكن كده بس برضه ظراف اوي ومعاهم سي دي وفي شعر في الاخر عن القصة
بس اظن الفكرة موجودة كتير ان كتاب يبقى بيركز على حرف معين دوروا هتلاقوا كتير
جزاهم الله كل خير اللي دلوني على كل الحاجات دي وبحثوا ودوروا كتير ربنا يجعله في ميزان حسناتهم
