اولا كل سنة وانتم
طيبين وربنا يتقبل منا ومنكم الطاعات يارب ويجعلنا من عتقائه من النار في هذه
الأيام المباركة
عايزين مننساش نجدد
نوايانا في تربية وتعليم أطفالنا وندعي كتييييير بالتوفيق لأننا للاسف وسط القراية
والانشطة والبحث والهوجة دي بننسى نطلب التوفيق والمعونة من الله فاذكر نفسي
واياكم
تعالوا بقى نرجع
لمرجوعنا كنا بنقول بقى ان اهم حاجة هو اننا نتعامل نفسيا وعاطفيا صح مع ولادنا
وده اهم واول حاجة لازم نهتم اننا نتعلمها ونقرأ ونبحث فيها، لو اعدت مع ولادي
اطبق الغسيل ولا اغسل شوية مواعين واحنا بنتكلم ونضحك ونسمع بعض افيد لعقلهم
ولتطوره ولنموهم النفسي بكتييييييييييير من الانشطة اللي شارينها باد كده وانا
متعصبة او بزعق ومش بقضي وقت خاص وهادي معاهم، ياريت نراجع نفسنا وننسى بقى
المنتسوري ووالدورف ومدونة فلانة وعلانة ونركز على علاقتنا السوية الصحيحة مع
ولادنا وبعدها بقى نعمل كل اللي احنا عايزينه
اصلا كل الفلسفات
التعليمية دي مش بس انشطة لا هي في الاصل اسس تعامل وتربوي وتفهم لعقل الطفل
ومراحل نموه العقلي والعاطفي والجسدي وقدراته وحقوقه و و و
انا بس كل اللي بدعو
ليه اننا قبل منطبق الفلسفات دي كمجرد انشطة وشوية حاجات خشب ولا الوان ، لا
ناخدها كلها على بعضها ونتعامل مع الطفل صح مش تتحول الفلسفات دي لمجرد شوية ادوات
بتخلينا في سباق بنجري وراه ومش مهم ولادنا عايزين ايه ولا بنعاملهم صح ولا لا ولا
قدراتهم ايه
الهدف التاني زي مقولنا
اننا نوضح فلسفات تانية غير منتسوري هنتكلم شوية عن والدورف وطبعا احنا مش شرط
نلتزم بكل حاجة في اي فلسفة منهم ممكن ناخد اللي يعجبنا ويناسب ولادنا ويناسب
طريقة حياتنا بهدوء وبحب بجد ، خلونا اصلا نفتكر اننا بنطلع من نظام تعليمي تحت
القاع بكتير، نظام فاشل وسئ جدا فيعني كفاية اوي اننا نخرج منه ونحترم عقول
ونفسيات ولادنا مش لازم اصلا اختيار فلسفة عظيمة ونمشي عليها بحذافيرها، طبعا شئ
جميل اننا نبحث وندور على طرق تعليمية تحترم عقول ولادنا وتطورهم وتنميهم بس ده
يكون بهدوء وبتعامل صح معاهم وبتطبيق اي حاجات بسيطة طول محنا ماشيين لأن للاسف
ساعات الوقت بيضيع واحنا بنبحث على الحاجات العظيمة دي وبننسى نقضي وقت مع ولادنا
وبننسى نطبق اي حاجة ولو بسيطة تحت دعوى اننا بندور وبنفكر في حاجة اكبر بكتير وده
انا شخصيا وقعت فيه فترات كتير فبنصحكم وبنصح نفسي اننا نقضي معاهم وقت خاص مميز
بتركيز من غير لوم ولا عتاب ولا اصدار احكام ونعمل اي حاجة نقرأ قصة، نغسل حتى
مواعين زي مقولنا، حتى واحنا بنبحث على حاجات اكبر واعمق
ليست هناك تعليقات:
إرسال تعليق