الخميس، 9 يونيو 2016

فلسفة والدورف

والدورف 



في المقال ده هنتكلم بشكل عام ومختصر عن فلسفة والدورف والأسس بتاعتها.

فلسفة والدورف بتركز على قلب وعقل وجسد الطفل وان التعليم بيشمل التلاتة مع بعض ككل. 

من ضمن أسس والدورف:
- التركيز على الترابط في الأسرة والعلاقة بين الطفل وأهله
- العلاقة بالطبيعة
- تطوير الخيال والحواس 
- الابتكار
- اللعب 
- الفن
- ومن أهم الأسس هي وجود ايقاع منتظم يعني زي مبنقول روتين 

كل حاجة بيتعلمها الطفل في والدورف لازم يبقى فيها فن ورسم وتلوين وتشكيل بالعجين وحركة بالايد في الهواء والجسم 

بيهتموا أوي بالأنشطة اليدوية وبتبقى أساسية زي النجارة والخبز والكروشيه والخياطة وغيرهم كتير 

كمان اللعب التخيلي وحكي القصص وتمثيلها كمان أساسي جدًا 

كل حاجة من مواد طبيعية ومعمولة يدويا مفيش صور وجداول مطبوعة حتى الالعاب يعملوها يدويا


وزي محنا عارفين ان الطفل في السنين الأولى بيبقى الجزء الأيمن للمخ هو اللي شغال اكتر وده الجزء بتاع الخيال والألوان والايقاع وغيره عشان كده انا بحس ان والدورف مهم اوي للأطفال في السن ده وانها فلسفة حرة جدا مفيش اي ادوات محددة ولا انشطة لازم تتعمل بطريقة معينة ودي من اكتر الحاجات اللي بتميزه.

رودلف شتاينر مؤسس الفلسفة دي قسم مراحل نمو الأطفال لتلات مراحل 

0-7: دي التركيز فيها بيبقى على الجسد واللعب الحركي والخيال واللعب الحر والتقليد والمفروض ان التعليم الأكاديمي يبقى قليل جدًا او مش موجود اصلا في المرحلة دي.

من 7- 14: التركيز في الفترة دي بيبقى على القلب والمشاعر والتواصل مع الاخرين وبيبقى بيبحث عن قدوة وبيبتدي في السن ده الحس الأخلاقي يظهر.

من 14 -21: التركيز بيتحول هنا للتفكير والعقل. وبانتهاء المرحلة دي بتبتدي حياة الطفل كانسان بالغ.

طبعا في تفاصيل كتير بس احنا مش محتاجين نتعمق اوي كفاية اننا نعرف الأسس ونبتدي نطبق. 

اهم حاجة اننا نبتدي ناخد خطوة خطوة مش لازم نعمل كل حاجة صح من اول مرة لا ممكن ناخد شهر واتنين وسنة بس المهم اننا نطبق ولو جزء بسيط وكل شوية نزود عليه.

وده اللي انا قررت اعمله وهنشر تطبيقاتي مع بنتي ان شاء الله وللي ميعرفش احنا في المجموعة بتاعتنا بعد مشاورات وبحث كتير اخترنا منهج "Oak Meadow" فده ان شاء الله اللي هبتدي اطبق منه مع طبعا اي حاجة خارجية هحتاجها. 

ان شاء الله المقال الجاي نتكلم عن اول تطبيق وهو الايقاع او الروتين واهميته سواء روتين يومي أو اسبوعي أو شهري ودي صور لبعض نماذج الروتين من امهات بيطبقوا والدورف 










هناك 11 تعليقًا:

  1. جميل يا نهى ..ربنا يوفقك

    ردحذف
  2. أزال المؤلف هذا التعليق.

    ردحذف
  3. رائع بقالى فترة طويلة بفكر فيه ونفسى اجمع معلومات عن كيفية تطبيقه فى انتظارك يانهى شكرا اوى

    ردحذف
  4. مقال جميل .. بالتوفيق

    ردحذف
  5. ربنا يوفقك كملى انا معاكى

    ردحذف
  6. جمبل ماشاء الله ...هي بنوتك عندها اد ايه؟واللي هنقدميه هنا هيكون مناسب للاطفتا حتى 7 سنوات؟

    ردحذف
    الردود
    1. بنتي 4 ونص وطبعا تقدري تطبقي نفس الافكار حسب سن الطفل وفي مناهج برضه لكل سن

      حذف
  7. http://almarefh.net/show_content_sub.php?CUV=385&Model=M&SubModel=138&ID=1137&ShowAll=On
    ايه رايك في المقال ده اريد بالتوضيح الممل للاهمية والاطلاع للمتابعين وشكرا وشكرا لام رقية علي احضار لينك الموضوع

    ردحذف
  8. جميل ..انا جديده ومتابعه

    ردحذف