المقال الأول: ايقاع (روتين) اليوم في والدورف

بسم الله الرحمن الرحيم 

انهاردة هنتكلم عن اول حاجة ممكن نبتدي بيها وانا قررت ابتدي بيها لاهميتها وهي الايقاع او الروتين

في والدورف مهم اوي ان يبقى في ايقاع ثابت يومي واسبوعي وشهري وغيره 

الايقاع يعني نظام متكرر، الايقاع حاجة موجودة بشكل طبيعي جوانا وبرة في العالم اللي بنعيش فيه، تنفسنا ودقات قلبنا، تعاقب الليل والنهار والايام والشهور والفصول ، كل دي انواع من الايقاع المنتظم المتكرر في حياتنا وبتريحنا لأن هي منتظمة ومتوقعة، الايقاع مهم جدا للاطفال لأنه بيحسسهم بالامان لما يبقوا عارفين ايه اللي جاي وكمان بيخلينا مركزين وننجز اكتر. 

الكلام ده يا جماعة اتقال برضه في التربية الايجابية لما اتكلموا عن اهمية الروتين للاطفال وبذات انهم يشاركونا في وضعه وان اد ايه ده مهم ليهم عشان احساسهم بالامان وبيقلل الصراعات ع الحاجات الاساسية اللي كلنا كتير بنعاني منها زي وقت النوم او الصبح او الخروج، اوعوا تتخيلوا ان الطفل مبسوط باليوم اللي ماشي كده وخلاص من غير انتظام وايقاع ثابت ومش معنى كده انه يبقى ماشي بالدقيقة والساعة لا بيبقى بطريقة انسيابية وبسيطة بس بيبقى مفيد لينا وليهم جدا وفي حرية لينا كلنا مع الامان والانجاز.

في والدورف بيبقى اليوم ماشي ما بين وقت تركيز ووقت حر، يعني وقت بيتعمل في حاجة محددة مع الولاد وبعدها وقت حر، وبعدها تركيز في نشاط او درس معين وبعدها وقت حر وهكذا، وطبعا الوقت الحر ده مهم جدااااااااااا للولاد واكيد كلنا لاحظنا اد ايه ولادنا بيبدعوا ويفكروا في افكار مختلفة كتير لما بيكونوا لوحدهم بيبتكروا كمية العاب وافكار الوقت ده مهم اوي اوي لعقلهم ولتنمية مهاراتهم. 

اهم حاجة كمان بالنسبة للي بيطبق التعليم المنزلي اننا نظبط ايقاع اليوم حسب حياتنا العادية وانشطة البيت العادية والاطفال يشاركوا فيها. 


بيركزوا كمان في والدورف على الاناشيد في كل حاجة يعني نشيد الصبح وطبعا وقت الحلقة واحنا كمان ممكن ندخل الاذكار معانا يوميا الصبح وهكذا، المهم حاجات بسيطة ثابتة منتظمة ومابين تركيز ووقت حر.

المرة اللي فاتت عرضنا نماذج لافكار للايقاع من مدونات اجنبية، اما انهاردة دي صورة ايقاع يومنا في رمضان اللي بنحاول طبعا جاهدين نمشي عليه وحاولت اخليه بسيط عشان نحاول بس نلتزم بيه ونمشي عليه فعلا خصوصا في وقت رمضان اللي بيبقى مختلف شوية، وان شاء الله بعد رمضان نعمل ايقاع اليوم العادي بتاعنا واصورهلكوا وحلو كمان اننا نستخدم صور بسيطة والولاد يرسموا ويلونوا معانا عشان يفهموا المكتوب وزي محنا شايفين كل حاجة يدوي وبالوان 

وده نشاط عملناه عن سورة الشمس حاولت ادخل فكرة والدورف في الموضوع بالرسم والتلوين وطبعا دي حاجات بسيطة ممكن تبدعوا اكتر كمان وكنت خدت في دورة بالقرآن تحيا القلوب عن فكرة ربط الطفل بالقرآن باننا نخليه بانشطة وافكار محببة ليهم 

انا عملته بادوات بسيطة جدا عشان مكناش محضرين بس مش مهم المهم اننا نبتدي وننفذ لأني فعلا كنت زمان بفضل واقفة كتير جدا لأني منتظرة اشتري ادوات معينة او اطبع حاجة معينة والنتيجة كانت ان الوقت بيضيع ومش بنطبق حاجة، طبقوا بابسط حاجة عندكوا المهم الفكرة نفسها 

دعواتكوا بالاستمرار والتنفيذ وان شاء الله المرة الجاية معادنا مع تطبيق جديد لفلسفة والدورف